સુવર્ણપુરી સમાચાર
પૂ. ગુરુદેવનો ૬૩ મો જન્મોત્સવ
વૈશાખ સુદ બીજે પરમ ઉપકારી પૂજ્ય ગુરુદેવશ્રીની ૬૩ મી જન્મજયંતિનો કલ્યાણકારી મહોત્સવ ખાસ
ઉલ્લાસપૂર્વક ઊજવાયો હતો; તેમાં દર વર્ષની માફક સવારમાં દેવ–ગુરુ–શાસ્ત્ર દર્શન, પૂજન, પ્રવચનયાત્રા,
ભક્તિ વગેરે કાર્યક્રમો રાખવામાં આવ્યા હતા. આ ઉપરાંત કેટલાક ભક્તજનો તરફથી ૬૩ના મેળવાળી રકમો
જાહેર કરવામાં આવી હતી, તેમાં લગભગ ૩૩૦૦ રૂા. થયા હતા.
શ્રી સમવસરણ પ્રતિષ્ઠાનો ૧૧ મો વાર્ષિકોત્સવ
વૈશાખ વદ છઠ્ઠે શ્રી સમવસરણની પ્રતિષ્ઠાના દસ વર્ષ પૂર્ણ થઈને ૧૧ મો વાર્ષિકોત્સવ ઊજવાયો હતો.
આ પ્રસંગે શ્રી દેવ–ગુરુ–શાસ્ત્ર દર્શન–પૂજન–ભક્તિ તેમજ શ્રી જિનેન્દ્રદેવની રથયાત્રા વગેરે કાર્યક્રમો રાખવામાં
આવ્યા હતાં. આજના મંગલ પ્રસંગના ખાસ પ્રવચનમાં સમવસરણ સંબંધી વાત વિસ્તારથી આવી હતી અને
‘ખરેખર સમવસરણને કોણે માન્યું કહેવાય?’ એ પૂ. ગુરુદેવશ્રીએ પોતાની વિશિષ્ટ ઢબે સમજાવ્યું હતું.
શ્રી માનસ્તંભ–શિલાન્યાસ મહોત્સવ
વૈશાખ વદ સાતમે મુમુક્ષુઓના ઘણા જ ઉલ્લાસની વચ્ચે, પરમ પૂજ્ય પરમ કૃપાળુ ગુરુદેવશ્રીની મંગલ
છાયામાં, પવિત્રાત્મા પૂ. ભગવતી બેનશ્રી ચંપાબેનના સુહસ્તે શ્રી માનસ્તંભજીના શિલાન્યાસનો મહોત્સવ થયો
હતો. સવારમાં દેવ–ગુરુ–શાસ્ત્ર દર્શન બાદ શિલાન્યાસ વિધિ થઈ હતી. તેમાં પ્રથમ પૂજનાદિ થયા બાદ
પૂ. ગુરુદેવશ્રીએ માંગળિક સંભળાવ્યું હતું. માંગળિક બાદ તુરત (સવારમાં છ વાગે) ખૂબ જ ઉત્સાહમય
વાતાવરણ વચ્ચે પૂ. ભગવતી બેનશ્રી ચંપાબેને શિલાન્યાસની મંગલ શરૂઆત કરી હતી, અને ત્યાર પછી શેઠ શ્રી
નાનાલાલભાઈ વગેરેએ પણ શિલાન્યાસ કર્યું હતું. ત્યાર બાદ જિનમંદિરમાં પૂજન થયું હતું. આજે મંગલ
પ્રવચનમાં પૂ. ગુરુદેવશ્રીએ માનસ્તંભનો મહિમા સમજાવ્યો હતો. આજે માનસ્તંભ સંબંધી ભક્તિ પણ ખાસ
ઉલ્લાસથી કરવામાં આવી હતી.
શ્રી સ્વાધ્યાય મંદિરના ઉદ્ઘાટનનો અને સમયસારજીની સ્થાપનાનો વાર્ષિકોત્સવ
વૈશાખવદ આઠમે શ્રી સ્વાધ્યાય મંદિરના ઉદ્ઘાટનનો અને તેમાં શ્રી સમયસારજીની સ્થાપનાનો ૧પમો
વાર્ષિકોત્સવ ઉજવાયો હતો. આ દિવસે સવારમાં દેવ–ગુરુ–શાસ્ત્રનાં દર્શન, પૂજન બાદ શ્રી સમયસારજીની
રથયાત્રા નીકળી હતી. પ્રવચનમાં પૂ. ગુરુદેવશ્રીએ સમયસારના પહેલા કળશ ઉપર ખાસ પ્રવચન કરીને
સમયસારનું માંગળિક કર્યું હતું. પ્રવચન બાદ શાસ્ત્ર પૂજન થયું હતું. બપોરે સમયસારજીની સ્વાધ્યાય થઈ હતી.
ભક્તિમાં આજે સમયસારજીની સ્થાપના કરીને ખાસ શાસ્ત્ર ભક્તિ કરવામાં આવી હતી.
–આ પ્રમાણે વૈશાખ વદ છઠ્ઠ–સાતમ ને આઠમ એ ત્રણે દિવસો મંગલ મહોત્સવપૂર્વક ઉજવાયા હતા,
અને ભક્તજનોએ બહુ ઉલ્લાસપૂર્વક તેમાં ભાગ લીધો હતો. શ્રી માનસ્તંભજીના શિલાન્યાસ પ્રસંગે માનસ્તંભ–
ફંડ આગળ ચાલ્યું હતું; તેમાં લગભગ રૂા. એકલાખ ને બે હજાર થયા છે. (ફંડની વિગત આવતા અંકે અપાશે.)
***
વૈશાખ સુદ ૧૩ ના રોજ ભાઈશ્રી વછરાજ ગુલાબચંદના મકાનનું વાસ્તુ હતું; આ પ્રસંગ નિમિત્તે તેમણે
પૂ. ગુરુદેવશ્રીનું પ્રવચન પોતાને ઘેર કરાવ્યું હતું, અને લગભગ રૂા. ૨પ૦) જુદા જુદા ખાતામાં અર્પણ કર્યા
હતા.
***
સવારના પ્રવચનમાં શ્રી નિયમસારજી–ભાગવતશાસ્ત્ર વંચાતું હતું તે પૂર્ણ થઈને વૈશાખ સુદ પાંચમથી
શ્રી કાર્તિકેયસ્વામી રચિત દ્વાદશઅનુપ્રેક્ષાનું વાંચન શરૂ થયું છે; બપોરે શ્રી પંચાસ્તિકાય વંચાય છે.
***