મં..ગ..લ..પ્ર..ભા..ત..ની...મં..ગ..લ..વા..ણી
* આજે મંગલ પ્રભાતમાં પંચપરમેષ્ઠી ભગવંતોને નમસ્કાર.
* પંચપરમેષ્ઠીના આત્મામાં અતીન્દ્રિય આનંદની છોળો ઊછળતી હોય છે.
* એ પંચપરમેષ્ઠિને ઓળખીને નમસ્કાર કરતાં આત્માના ભાવમાં પવિત્રતા થાય
છે, તે મંગળ છે.
* પંચપરમેષ્ઠીના પ્રસાદથી અમે ચૈતન્યસુખડી ખાશું ને ભવની ભૂખડી ભાંગશું.–આ
બેસતા વર્ષના મિષ્ટાન્ન!
* અહા, ચૈતન્યસુખના અનુભવની શી વાત!
* સમસ્ત કર્મો અને પરભાવો મારા અનુભવથી બહાર છે.
* સાધકને એક વિકલ્પથી જે પુણ્ય બંધાય તે પુણ્ય પણ જગતને વિસ્મય ઉપજાવે,
તો એના નિર્વિકલ્પ સાધકભાવના મહિમાની શી વાત?
* વીતરાગપ્રભુનો વીરમાર્ગ એ શૂરવીરનો માર્ગ છે. અહા, આવો વીતરાગમાર્ગ
સાધવો એ તો વીરનાં કામ છે, એ કાયરનાં કામ નથી.
* રાગના બંધનમાં બંધાઈ રહે એને વીર કેમ કહેવાય? વીર તો તેને કહેવાય કે જે
રાગનાં બંધન તોડીને મોક્ષમાર્ગને સાધે.
* અહા, સાધકભાવના અંશનોય એવો અચિંત્ય મહિમા છે કે તીર્થંકરપ્રકૃતિનાં
પુણ્ય પણ તેને પહોંચી ન શકે.
* તીર્થંકરપ્રકૃતિ એ તો વિભાવનું ફળ, ને સાધકભાવ એ તો સ્વભાવનું ફળ.–
બંનેની જાત જ જુદી.
* સાધકને ચૈતન્યનો જે મહિમા જાગ્યો છે, રાગ તેને લૂંટી શકશે નહિ. ચૈતન્ય
મહિમામાં આગળ વધીને એ કેવળજ્ઞાનરૂપ સુપ્રભાતને સાધશે.
એ મંગળ બેસતું વર્ષ છે.
************
* સાધકને ચૈતન્ય સાધવા માટે જગતમાં બધુંય અનુકૂળ જ છે; એને કાંઈ પ્રતિકૂળ
છે જ નહિ. કેમકે એની સાધના આત્માના આધારે છે, સંયોગના આધારે નથી.
* મુમુક્ષુ પ્રતિકૂળતાના પ્રસંગને પણ ધર્મભાવનાની તીવ્રતાનું તેમજ જિનભક્તિ–
આત્મસાધના વગેરેની ઉત્કૃષ્ટતાનું કારણ બનાવે છે.
* ધર્મભાવનામાં ને જિનેન્દ્રદેવના ચરણમાં જેનું મન અચલ છે એને પ્રતિકૂળતા
શી?
* ભગવાન જરાય દૂર નથી, ભગવાન તો સાધકના જ્ઞાનમાં જ બિરાજી રહ્યા છે.
* જીવનની પ્રત્યેક પળનાં વહેણ ચૈતન્યસાધના અર્થે જ વહો.