Moksha-Marg Prakashak-Hindi (iso15919 transliteration). Page: 80.

90 ] [ mokṣamārgaprakāśak

is prakār padārthameṁ iṣṭa-aniṣṭapanā hai nahīṁ. yadi padārthameṁ iṣṭa-aniṣṭapanā hotā to jo

padārtha iṣṭa hotā vah sabhīko iṣṭa hī hotā aur aniṣṭa hotā vah aniṣṭa hī hotā; parantu
aisā hai nahīṁ. yah jīv kalpanā dvārā unheṁ iṣṭa-aniṣṭa mānatā hai so yah kalpanā jhūṭhī hai.

tathā padārtha sukhadāyak – upakārī yā duḥkhadāyak – anupakārī hotā hai so apane āp

nahīṁ hotā, parantu puṇya-pāpake udayānusār hotā hai. jisake puṇyakā uday hotā hai, usako
padārthoṁkā saṁyog sukhadāyak – upakārī hotā hai aur jisake pāpakā uday hotā hai use padārthoṁkā

saṁyog duḥkhadāyak – anupakārī hotā hai. — aisā pratyakṣa dekhate haiṁ. kisīko strī-putrādik

sukhadāyak haiṁ, kisīko duḥkhadāyak haiṁ; kisīko vyāpār karanese lābh hai, kisīko nukasān
hai; kisīke śatru bhī dās hojāte haiṁ, kisīke putra bhī ahitakārī hotā hai. isaliye jānā
jātā hai ki padārtha apane āp iṣṭa-aniṣṭa nahīṁ hote, parantu karmodayake anusār pravartate haiṁ.
jaise kisīke naukar apane svāmīke kahe anusār kisī puruṣako iṣṭa-aniṣṭa utpanna kareṁ to
vah kuch naukaroṁkā karttavya nahīṁ hai, unake svāmīkā karttavya hai. koī naukaroṁko hī iṣṭa-
aniṣṭa māne to jhūṭh hai. usī prakār karmake udayase prāpta hue padārtha karmake anusār jīvako
iṣṭa-aniṣṭa utpanna kareṁ to vah koī padārthoṁkā karttavya nahīṁ hai, karmakā karttavya hai. yadi
padārthoṁko hī iṣṭa-aniṣṭa māne to jhūṭh hai.

isaliye yah bāt siddha huī ki padārthoṁko iṣṭa-aniṣṭa mānakar unameṁ rāg-dveṣ karanā

mithyā hai.

yahān̐ koī kahe ki — bāhya vastuoṁkā saṁyog karmanimittase banatā hai, tab karmomeṁ to

rāg-dveṣ karanā?

samādhānaḥ — karma to jaṛ haiṁ, unake kuch sukh-duḥkh denekī icchā nahīṁ hai. tathā ve

svayamev to karmarūp pariṇamit hote nahīṁ haiṁ, isake bhāvoṁke nimittase karmarūp hote haiṁ. jaise —

koī apane hāthase patthar lekar apanā sir phoṛ le to pattharakā kyā doṣ hai? usī prakār
jīv apane rāgādik bhāvoṁse pudgalako karmarūp pariṇamit karake apanā burā kare to karmakā
kyā doṣ hai? isaliye karmase bhī rāg-dveṣ karanā mithyā hai.

is prakār paradravyoṁko iṣṭa-aniṣṭa mānakar rāg-dveṣ karanā mithyā hai. yadi paradravya

iṣṭa-aniṣṭa hote aur vahān̐ rāg-dveṣ karatā to mithyā nām na pātā; ve to iṣṭa-aniṣṭa haiṁ
nahīṁ aur yah iṣṭa-aniṣṭa mānakar rāg-dveṣ karatā hai, isaliye is pariṇamanako mithyā kahā
hai. mithyārūp jo pariṇaman, usakā nām mithyācāritra hai.

< Previous Page Next Page >