adhyātmameṁ sadā niścayanay hī pradhān hai, usīke āśrayase dharma hotā hai . śāstroṁmeṁ jahān̐ vikārī paryāyoṁkā vyavahāranayase kathan kiyā jāve vahān̐ bhī niścayanay ko hī mukhya aur vyavahāranayako gauṇ karanekā āśay hai aisā samajhanā cāhiye . kyoṁki puruṣārthake dvārā apanemeṁ śuddha paryāyako pragaṭ karane arthāt vikārī paryāyako ṭālaneke liye sadā niścayanay hī ādaraṇīy hai . us samay donoṁ nayoṁkā jñān hotā hai, kintu dharmako pragaṭ karaneke liye dr̥ṣṭimeṁ donoṁ nay kadāpi ādaraṇīy nahīṁ haiṁ . vyavahāranayake āśrayase ka bhī āṁśik dharma bhī nahīṁ hotā, pratyut usake āśrayase rāgadveṣake vikalpa hī uṭhā karate haiṁ .
chahoṁ dravya, unake guṇ aur unakī paryāyoṁke svarūpakā jñān karāneke liye kabhī niścayanayakī mukhyatā aur vyavahāranayakī gauṇatā rakhakar kathan kiyā jātā hai, aur kabhī vyavahāranayako mukhya karake aur niścayanayako gauṇ rakhakar kathan kiyā jātā hai . svayaṁ vicār kare usameṁ bhī kabhī niścayanayakī aur kabhī vyavahāranayakī mukhyatā kī jātī hai . adhyātmaśāstrameṁ bhī jīvakī vikārī paryāy jīv svayaṁ karatā hai to hotī hai, aur vah jīvakā ananya pariṇām hai — isaprakār vyavahāranayase kahā yā samajhāyā jāy, kintu us pratyek samayameṁ dr̥ṣṭimeṁ to niścayanay ek hī mukhya aur ādaraṇīy hai — aisā jñāniyoṁkā kathan hai . śuddhatā prakaṭ karaneke liye kabhī niścayanay ādaraṇīy hotā hai aur kabhī vyavahāranay – aisā mānanā bhūl hai . tīnoṁ kālameṁ ekamātra niścayanayake āśrayase hī dharma pragaṭ hotā hai – aisā samajhanā cāhiye .
sādhak jīv prāraṁbhase aṁt tak niścayakī hī mukhyatā rakhakar vyavahārako gauṇ hī karatā jātā hai, jisase sādhak daśāmeṁ niścayakī mukhyatāke balase sādhakake śuddhatākī vr̥ddhi hī hotī jātī hai aur aśuddhatā ṭalatī hī jātī hai . isaprakār niścayakī mukhyatāke balase pūrṇa kevalajñān hone par vahān̐ mukhyatva gauṇatva nahīṁ hotā aur nay bhī nahīṁ hote .