: ૪ : ભગવાન શ્રી મહાવીર નિર્વાણ મહોત્સવ અંક કારતક : ૨૪૭૨
‘આત્મધર્મ’ પ્રથમ સાં–
૨૦૦૦ ના માગસર સુદ ૨ ના
રોજ પ્રસિદ્ધ થયું હતું, આજે તે
ચોવીશ અંક પૂરા કરી પચીશમાં
અંકમાં પ્રવેશ કરે છે.
જગતના જીવો અનાદિથી
દુઃખી છે, કેમકે તે નિજ સ્વરૂપથી
અજ્ઞાત છે. શાશ્વતસુખ મેળવવાને
માટે તેઓ અનેક બાહ્ય ઉપાયો
નિરંતર કર્યા કરે છે પણ તે ઉપાયો
ખોટા હોવાથી સુખને બદલે
દુઃખનો અનંત પ્રવાહ ચાલુ રહે છે.
આ પ્રમાણેની સ્થિતિ હોવાથી
જીવોને શાશ્વતસુખનો માર્ગ આ
માસિકમાં દર્શાવવામાં આવે છે.
આ માસિક વિશ્વના તમામ
પદાર્થોની સંપૂર્ણ સ્વતંત્રતા જાહેર
કરે છે અને વીતરાગી–વિજ્ઞાન તે
જ ધર્મ છે એમ તેમાં બતાવવામાં
આવે છે. વીતરાગીવિજ્ઞાનને
વિશ્વધર્મ–જૈનધર્મ કે વસ્તુ
સ્વરૂપનો ધર્મ કહેવામાં આવે છે.
વસ્તુ સ્વરૂપ–જૈનધર્મ તે
વાડો કે સંપ્રદાય હોઈ શકે જ નહિ.
આ સ્વરૂપ આત્મજ્ઞાની પુરુષો જ
પ્રતિપાદન કરી શકે અને તેથી પૂ.
સદ્ગુરુદેવશ્રી કાનજી સ્વામીના
આત્મઅનુભવમાંથી નીકળતી
અમૃતવાણી આ માસિકમાં પ્રસિદ્ધ
કરવામાં આવે છે. તે સિવાય આ
માસિકમાં પ્રસિદ્ધ આચાર્યોનાં
શાસ્ત્રો ઉપરથી તૈયાર કરેલા લેખો
આપવામાં આવે છે.
આ માસિક લોકપ્રિય થયું
છે, ઘણા મુમુક્ષુઓ તેનો લાભ લે
છે; આજે તેના આશરે ૧૫૦૦
ગ્રાહકો છે, પરંતુ તેનો વિશેષ
વિશેષ બહોળો પ્રચાર થવાની
જરૂર છે તેથી આ માસિકનો ઘણો
બહોળો પ્રચાર કરી જ્ઞાન
પ્રભાવના કરવા મુમુક્ષુઓને
વિનંતિ છે.
રામજી માણેકચંદ
આજે આત્મધર્મ પચીશમાં અંકમાં પ્રવેશ કરે છે, એ વખતે હું અત્યંત
આનંદ અને ઉલ્લાસ અનુભવું છું. અનાદિ અનંત સનાતન સત્ય એક જ હોય છે
અને તે શાશ્વત સત્ય આત્મધર્મ માસિક દ્વારા પ્રગટ થાય છે, એથી આત્મધર્મ
પ્રગટ કરવામાં મારું પરમ સૌભાગ્ય માનું છું.
પરંતુ આજે તો એથીયે વિશેષ આનંદ પ્રગટ કરવા પ્રેરાયો છું તે એ કે, છેલ્લા
૨૪ માસથી જેમના નિકટ સહવાસમાં આવ્યો છું તે આત્મધર્મ માસિકના માનદ્
સંપાદક વંદનીય મુરબ્બી શ્રી રામજીભાઈના સમાગમથી હું મને ધન્ય માનું છું.
જેમને પરમ પૂજ્ય સદ્ગુરુદેવશ્રી ‘ભાઈ’ જેવા અતિ પ્રેમ ભર્યા શબ્દોથી
સંબોધે છે એ વંદનીય શ્રી રામજીભાઈ ખેરખર સર્વ મુમુક્ષુઓની ભીડ ભાંગનાર
ભાઈ જ છે. તેઓશ્રીની સનાતન જૈનધર્મ (વસ્તુ સ્વરૂપ)ની અવિચલ શ્રધ્ધા,
તેઓશ્રીનું એ પાવનકારી જિનવાણીનું સૂક્ષ્મજ્ઞાન અને તે જ શ્રધ્ધા અને જ્ઞાનમાં
રમણતા કરવાનો તેઓશ્રીનો અખંડ પુરુષાર્થ આપણ સૌને પ્રેરણા અને વંદનરૂપ હો.!
વિશેષ શું કહું! તેઓશ્રીની દ્રઢતા, બુદ્ધિમત્તા, સહનશિલતા, નિર્ભયતા,
નિડરતા, નિઃસ્પૃહતા, નિર્મમતા, નિશ્ચિંતતા, નિરભિમાનતા, ઉદારતા, સરળતા,
એકાગ્રતા, લઘુતા, અર્પણતા, વાત્સલ્યતા, ઉદાસિનતા, સત્યપ્રિયતા, જિતેંદ્રિયતા,
કાર્યકૌશલ્યતા અને કર્તવ્યપરાયણતા આદિ અનેક ગુણોએ મને સદાય આકર્ષ્યો
છે.–અંતરાત્મા તરફ વાળ્યો છે.
આત્મધર્મમાં અપાતી તમામ વસ્તુઓ તેઓશ્રી ખૂબ કાળજીપૂર્વક
ઝીણવટથી તપાસીને, વાંચકની રુચિને ઓળખીને–વર્તમાન સમયને બરાબર
લક્ષમાં રાખીને, સનાતન જૈન ધર્મના અપૂર્વ ન્યાયો, સાદી અને સરળ ભાષામાં
તથા આવા ગહન વિષયને પણ સહેલાઈથી સમજી શકાય એવી સુંદર શૈલીમાં
આપવાનો સતત પ્રયત્ન કરે છે. જેને માટે આપણે જ માત્ર નહિ પણ હવે
પછીના કાળમાં જૈનધર્મને યથાર્થરૂપે સમજવા ઈચ્છતા ધર્મીજીવો પણ તેઓશ્રીના
અત્યંત, અત્યંત આભારી છીએ.
જગતમાં ધર્મના નામે ચાલતા અનેક મતો, પંથો, સંપ્રદાયો, સમાજો અને
સંઘોના અભિપ્રાય સામે વાસ્તવિક ધર્મને રજુ કરતાં આત્મધર્મ જેવા કેવળ
અધ્યાત્મ વિષયના માસિકના સંપાદકના જાણપણા માટે સામાન્ય રીતે આજના
આ કહેવાતા વિજ્ઞાનના જમાનામાં કેટલાક અભ્યાસીઓને તેમજ સંશોધકોને
જાણવાનું મન થાય એ સ્વાભાવિક છે તેથી તેઓશ્રીનો સત્શાસ્ત્રોનો અભ્યાસ
તથા બીજા અન્ય ગ્રંથોનું વાંચન તેઓશ્રીના જ શબ્દોમાં અહીં આપું છું.
“પરમ પૂજ્ય સદ્ગુરુદેવશ્રી કાનજી સ્વામીના સત્સમાગમમાં હું સંવત
૧૯૮૯ ની સાલમાં આવ્યો છું અને ત્યારથી મને તેઓશ્રીની પવિત્ર વાણીનો
લાભ મળતો રહ્યો છે; તેઓશ્રીનો સત્સમાગમ થયાં પહેલાંં શ્રી સમયસાર, શ્રી
પ્રવચનસાર શ્રી પંચાસ્તિકાય, શ્રી પંચાધ્યાયી વગેરે શાસ્ત્રોનું મને વાંચન હતું.
પણ તેના ભાવ હું સમજી શક્યો નહોતો. નિશ્ચય અને વ્યવહારનયના કથનો
આવતાં તેના અર્થ સં. ૧૯૯૦ માં તેઓશ્રીના ઉપદેશથી રાજકોટમાં શ્રી
સમયસારનું વાંચન થયું ત્યારે સમજી શકયો હતો, તે પહેલાંં નિશ્ચય અને
વ્યવહારનયના અર્થો અને તેની સંધિ સમજાતી નહોતી. એ રીતે તેઓશ્રીના
ઉપદેશનો મને લાભ મળતાં વસ્તુ સ્વરૂપ જે રીતે સમજવામાં આવ્યું છે તે અહીં
(આત્મધર્મમાં) રજુ કરવામાં આવે છે. ત્યારપછી ઉત્તરાધ્યયન, પનવણા,
ભગવતિ જીવાધિગમ, જ્ઞાતા, સમવાયાંગ વગેરે શ્વેતાંબર સંપ્રદાયને માન્ય
શાસ્ત્રોનો પણ યથાશક્તિ અભ્યાસ કર્યો છે. આ ઉપરાંત યોગ, વૈશેષિક, સાંખ્ય,
નૈયાયિક, પંચદેશી, વિચારસાગર બ્રહ્મસૂત્ર, ગીતા વગેરે વેદાંત શાસ્ત્રો પણ
યથાશક્તિ વાંચ્યા છે.’
વંદનીય મુરબ્બી શ્રી રામજીભાઈ વિશે આ બધું તો પરમ પૂજ્ય
સદ્ગુરુદેવના દર્શન–શ્રવણાર્થે સોનગઢ આવનાર સૌ કોઈ જાણતા જ હોય એ
સ્વાભાવિક છે. પરંતુ તેઓના પ્રત્યેનું બહુમાન અને ભક્તિ પ્રગટ કરવાનો
આજે–આત્મધર્મની ત્રીજા વર્ષની શરૂઆતે–ઉલ્લાસ આવવાથી અત્યંત નિર્મળ
અને નિઃસ્પૃહ ભાવે લખું છું.
કારતક સુદ ૨ ૨૪૭૨ : મંગળવાર જમુ રવાણી