• નૂતન વર્ષના પ્રારંભે •
मंगलं भगवान् वीरो मंगल गौतमो गणी।
मंगलं कुन्दकुन्दार्यो जैनधर्मोस्तु मंगलम्।।
ભગવાન શ્રી સીમંધર...મહાવીરાદિ પંચપરમેષ્ઠી ભગવંતોને, પરમ ઉપકારી ગુરુદેવને અને જિનવાણી–
ભગવતીમાતાને અતિશય ભક્તિપૂર્વક આ નૂતન વર્ષના પ્રારંભે અભિવંદના કરીએ છીએ...તેમજ સર્વે સાધર્મી
જનોને વાત્સલ્યપૂર્વક અભિનંદન કરી છીએ..
આજે આપણું ‘આત્મધર્મ’ માસિક તેર વર્ષ પૂરાં કરીને ચૌદમા વર્ષમાં પ્રવેશ કરે છે. ‘આત્મધર્મ’ એ
ભારતનું અજોડ આધ્યાત્મિક પત્ર છે...તેમાં પરમપૂજ્ય સદ્ગુરુદેવ શ્રી કાનજીસ્વામીના આત્મહિતકારી ઉપદેશનો
મુખ્ય સાર આપવામાં આવે છે. હજારો જિજ્ઞાસુઓ હોંસે હોંસે આ માસિકનું વાંચન કરે છે ને તેમાં આવેલા પૂ.
ગુરુદેવના ઉપદેશદ્વારા શાંતિ અને ધર્મની પ્રેરણા મેળવે છે. સંસારના ઝંઝટોથી આ માસિક સદા દૂર રહે છે.
જિજ્ઞાસુ જીવોનું મહાન સૌભાગ્ય છે કે, સંસારમાં ચારે તરફ જ્યારે અત્યંત કિલષ્ટ અને હળહળતું
વાતાવરણ ઘેરાયેલું છે ત્યારે પણ, આત્માને જગતથી જુદો પાડીને આત્મિક શાંતિ પ્રાપ્ત કરવાનો અપૂર્વ
કલ્યાણકારી રાહ પરમપૂજ્ય ગુરુદેવ બતાવી રહ્યા છે...હે ભવ્ય સાધર્મી બંધુઓ! સંસારના હળહળતા
વાતાવરણથી છૂટીને આત્મિકશાંતિ પ્રાપ્ત કરવા માટે, પૂ. ગુરુદેવે બતાવેલા આ પાવનપંથને ઓળખો અને શીઘ્ર
એને અનુસરો.
આ આત્મધર્મ માસિકનું વાર્ષિક લવાજમ રૂા. ત્રણ છે. તે મોકલવાનું સરનામું–
શ્રી જૈન સ્વાધ્યાય મંદિર, સોનગઢ (સૌરાષ્ટ્ર)
સોનગઢમાં વેદીપ્રતિષ્ઠા.પૂ. ગુરુદેવનો વિહાર
તીર્થરાજ સમ્મેદશિખરજીની યાત્રા
તીર્થધામ સોનગઢમાં જે ભવ્ય ઉન્નત અને સુશોભિત જિનમંદિર તૈયાર થયું છે તેના ઉપરના ભાગમાં
ભગવાન શ્રી નેમિનાથ પ્રભુની પુન: વેદીપ્રતિષ્ઠા કારતક સુદ ૧૨ ને ગુરુવાર તા. ૧૫–૧૧–૫૬ના શુભ દિવસે
થવાની છે. એ મંગલ દિને ઉપરના જિનમંદિરની વેદી ઉપર શ્રી નેમિનાથ ભગવાન બિરાજમાન થઈને
જિનમંદિરને શોભાવશે...એ જિનમંદિરનું ઉન્નત શિખર સુવર્ણકલશથી સુશોભિત થશે અને તેના ઉપર, જમીનથી
લગભગ ૭૫ ફૂટ ઊંચે ગગનમાં શ્રી જિનેન્દ્રદેવનો ધર્મધ્વજ ફરકશે. વેદીપ્રતિષ્ઠાનો મહોત્સવ કારતક સુદ ૧૦–
૧૧–૧૨ એ ત્રણ દિવસનો રાખવામાં આવ્યો છે.
સોનગઢ–જિનમંદિરની વેદીપ્રતિષ્ઠા બાદ, કારતક સુદ પૂર્ણિમાને રવિવારના રોજ પુનિત વિહાર કરીને પૂ.
ગુરુદેવ પાલેજ તરફ પધારશે. પાલેજમાં માગસર સુદ ૧૧ ના રોજ જિનમંદિરમાં ભગવાન શ્રી અનંતનાથ વગેરે
જિનેન્દ્રભગવંતોની વેદીપ્રતિષ્ઠા થવાની છે.
પાલેજ–પ્રતિષ્ઠા મહોત્સવ બાદ પૂ. ગુરુદેવ મુંબઈ પધારશે. ને ત્યારબાદ લગભગ પોષ વદ પાંચમે
સંઘસહિત શાશ્વત તીર્થરાજ સમ્મેદશિખરજી વગેરે તીર્થધામોની યાત્રા માટે સંઘસહિત પધારશે. સમ્મેદશિખરજી એ
આ ભરતભૂમિનું એકનું એક શાશ્વત તીર્થધામ છે, અનંતા તીર્થંકરો ત્યાંથી મુક્તિ પામ્યા છે; વર્તમાન ૨૫
તીર્થંકરોમાંથી ૨૦ તીર્થંકરો ત્યાંથી જ મુક્તિ પામ્યા છે. આવા સિદ્ધિધામની યાત્રાએ પૂ. ગુરુદેવ સંઘસહિત પધારી
રહ્યા છે–એ સમાચારથી દિગંબર જૈનસમાજમાં ગામેગામ ઉત્સાહ અને આનંદનું વાતાવરણ ફેલાઈ ગયું છે.
હાલના કાર્યક્રમ મુજબ યાત્રાસંઘ મુંબઈથી પોષ વદ પાંચમ ને રવિવારે શુભપ્રસ્થાન કરીને ગજપંથા,
માંગીતુંગી, ધૂળિયા, બડવાની, ઉન–પાવાગિરિ, ખંડવા, સિદ્ધવરફૂટ, ઇંદોર, ઉજ્જૈન, મક્ષી–બ્યોવરા, ગુના, ઝાંસી,
સોનાગિરિ, ગ્વલિયર, આગ્રા, મથુરા, શૌરીપુર, મૈનપુરી, કાનપુર, લખનૌ, અયોધ્યા, બનારસ, ડાલમિયાનગર,
આરા, પટના, રાજગૃહી, નાલંદા, કુંડલપુર, પાવાપૂરી, ગણાવા, ગયા, મધુવન–સમ્મેદશિખરધામ ફાગણ સુદ
પાંચમ લગભગમાં પહોંચશે.