✽ bhūmikā ✽
kavivar paṇḍit daulatarāmajī kr̥ut ‘‘chhahaḍhālā’’
jainasamājamen bhalībhān̐ti prachalit hai. anek bhāī-bahin usakā
nitya pāṭh karate haĩn. jain pāṭhashālāoṅkī yah ek pāṭhay pustak
hai. granthakārane samvat 1891kī vaishākh shuklā 3, (akṣhay-
tr̥utīyā)ke din is granthakī rachanā pūrṇa kī thī. is granthamen
dharmakā svarūp saṅkṣhepamen bhalībhān̐ti samajhāyā gayā hai; aur vah bhī
aisī saral subodh bhāṣhāmen ki bālakase lekar vr̥uddha tak sabhī
saralatāpūrvak samajh sakẽn.
is granthamen chhah ḍhālen (chhah prakaraṇ) hain, unamen ānevāle
viṣhayoṅkā varṇan yahān̐ saṅkṣhepamen kiyā jātā hai —
jīvakī anādikālīn sāt bhūlen
is granthakī dūsarī ḍhālamen chār gatimen paribhramaṇake
kāraṇarūp mithyādarshan-gnān-chāritrakā svarūp batāyā gayā hai.
isamen mithyādarshanake kāraṇarūp jīvakī anādise chalī ā rahī
sāt bhūloṅkā svarūp diyā gayā hai; vah saṅkṣhepamen nimnānusār hai –
(1) ‘‘sharīr hai so main hūn̐,’’ — aisā yah jīv anādi-kālase mān
rahā hai; isalie main sharīrake kārya kar sakatā hūn̐, sharīrakā
halan-chalan mujhase hotā hai; sharīr (indriyommen)ke dvārā main
jānatā hūn̐, sukhako bhogatā hūn̐, sharīr nirog ho to mujhe lābh
ho – ityādi prakārase vah sharīrako apanā mānatā hai, yah
mahān bhram hai. vah jīvako ajīv mānatā hai; yah jīvatattvakī
bhūl hai.