-
36 ] [ mokṣamārgaprakāśak
jñān-darśanopayogādikī pravr̥tti
is prakār jñān – darśanakā sadbhāv jñānāvaraṇ, darśanāvaraṇake kṣayopaśamake anusār hotā
hai. jab kṣayopaśam thoṛā hotā hai tab jñān – darśanakī śakti thoṛī hotī hai; jab bahut hotā
hai tab bahut hotī hai. tathā kṣayopaśamase śakti to aisī banī rahatī hai, parantu pariṇaman dvārā
ek jīvako ek kālameṁ ek viṣayakā hī dekhanā aur jānanā hotā hai. is pariṇaman hī
kā nām upayog hai. vahān̐ ek jīvako ek kālameṁ yā to jñānopayog hotā hai yā darśanopayog
hotā hai. tathā ek upayogake bhī ek bhedakī pravr̥tti hotī hai. jaise — matijñān ho tab anya
jñān nahīṁ hotā. tathā ek bhedameṁ bhī ek viṣayameṁ hī pravr̥tti hotī hai. jaise — sparśako jānatā
hai tab rasādikako nahīṁ jānatā. tathā ek viṣayameṁ bhī use kisī ek aṅgameṁ hī pravr̥tti hotī
hai. jaise — uṣṇa sparśako jānatā hai tab rūkṣādikako nahīṁ jānatā.
is prakār ek jīvako ek kālameṁ ek jñey athavā dr̥śyameṁ jñān athavā darśanakā
pariṇaman jānanā. aisā hī dikhāī detā hai. jab sunanemeṁ upayog lagā ho tab netrake samīp
sthit bhī padārtha nahīṁ dīkhatā. is hī prakār anya pravr̥tti dekhī jātī hai.
tathā pariṇamanameṁ śīghratā bahut hai. isase kisī kālameṁ aisā mān lete haiṁ ki yugapat
bhī anek viṣayoṁkā jānanā tathā dekhanā hotā hai, kintu yugapat hotā nahīṁ hai, kramameṁ hī
hotā hai, saṁskārabalase unakā sādhan rahatā hai. jaise — kaueke netrake do golak haiṁ, putalī
ek hai vah phi ratī śīghra hai, usase donoṁ golakoṁkā sādhan karatī hai; usī prakār is jīvake
dvār to anek haiṁ aur upayog ek hai, vah phi ratā śīghra hai, usase sarva dvāroṁkā sādhan
rahatā hai.
yahān̐ praśna hai ki — ek kālameṁ ek viṣayakā jānanā athavā dekhanā hotā hai to
itanā hī kṣayopaśam huā kaho, bahut kyoṁ kahate ho? aur tum kahate ho ki kṣayopaśamase
śakti hotī hai, to śakti to ātmāmeṁ kevalajñān – darśanakī bhī pāī jātī hai.
samādhānaḥ — jaise kisī puruṣake bahut grāmoṁmeṁ gaman karanekī śakti hai. tathā use kisīne
rokā aur yah kahā ki pān̐c grāmoṁmeṁ jāo, parantu ek dinameṁ ek grāmako jāo. vahān̐ us
puruṣake bahut grām jānekī śakti to dravya-apekṣā pāī jātī hai; anya kālameṁ sāmarthya ho, parantu
vartamān sāmarthyarūp nahīṁ hai — kyoṁki vartamānameṁ pān̐c grāmoṁse adhik grāmoṁmeṁ gaman nahīṁ kar
sakatā. tathā pān̐c grāmoṁmeṁ jānekī paryāy-apekṣā varttamān sāmarthyarūp śakti hai, kyoṁki unameṁ gaman
kar sakatā hai; tathā vyaktatā ek dinameṁ ek grāmako gaman karanekī hī pāī jātī hai.