સુવર્ણપુરી સમાચાર
પરમપૂજ્ય ગુરુદેવ સુખશાંતિમાં બિરાજે છે,
તેઓશ્રીની તબીયત સારી છે, આંખે પણ બરાબર
આરામ છે, ને સંતોષકારક રૂઝ તથા પ્રકાશ આવી
ગયેલ છે. ગુરુદેવની આંખના મોતિયા બાબત
ભક્તોમાં ખૂબ ચિંતા રહેતી હતી, પરંતુ ડો. ચીટનીસ
અને ડો. મનસુખભાઈ દ્વારા સફળ ઓપરેશન થતાં હવે
ચિંતાનો અંત આવ્યો છે.
જેઠ વદ ત્રીજના રોજ મોતિયો ઉતારવામાં આવ્યો.
ત્યાર બાદ અઠવાડિયા પછી (જેઠ વદ ૧૧ના રોજ)
જ્યારે આંખનો પાટો છોડી નાંખવામાં આવ્યો અને પૂ.
ગુરુદેવ પહેલવહેલાં સભામાં પાટ ઉપર પધાર્યા ત્યારે
સૌ ભક્તોએ ખૂબ જ આનંદિત થઈને ભાવભીની
સ્તુતિ કરી હતી; ડો. મનસુખલાલભાઈએ પણ હર્ષિત
થઈને તે દિવસે પ્રભાવના કરી હતી, ને પોતાને આવી
સેવાનો લાભ મળ્યો તે બદલ પ્રમોદ વ્યક્ત કર્યો હતો.
ત્યારબાદ ગુરુદેવની આંખમાં વધુ ને વધુ સુધારો
થતો ગયો અને આંખમાં બરાબર સંતોષકારક રૂઝ
આવી જતાં આ શ્રાવણ સુદ એકમના રોજ ચશમાના
નંબર કાઢવાનું નક્કી થયું; સાથે સાથે ડો. ચીટનીસ
અને ડો. મનસુખલાલભાઈ બંનેએ કાંઈ પણ ફી લીધા
વગર અત્યંત ચીવટપૂર્વક આ કાર્ય કરી આપ્યું તે માટે
તેમને બંનેને માનપત્ર આપવાનું પણ નક્કી થયું. આ
માટે ડો. ચીટનીસ શ્રાવણ સુદ એકમને રવિવારે
મુંબઈથી સોનગઢ આવ્યા.
સવારમાં સભાસ્થાન ચિક્કાર હતું. ગુરુદેવ
ભરસભામાં બિરાજેલા, તે વખતનું વાતાવરણ
આનંદમયી હતું. ગુરુદેવના પ્રભાવથી સ્વાધ્યાય
મંદિરનો દેખાવ આજે વિશેષ રળિયામણો લાગતો હતો.
સૌ ભક્તોએ હર્ષપૂર્વક ગુરુદેવની સ્તુતિ કરી.
ડો. ચીટનીસ પહેલાં તો સવારમાં આવી જવાના હતા,
પરંતુ મુંબઈથી ઉપડેલું એરોપ્લેન વાદળના ધૂમ્મસને
કારણે ભાવનગર ઉતરી ન શકવાથી તેઓ ફરીને
બપોરમાં એરોપ્લેનમાં આવ્યા. લગભગ સાડાચાર
વાગે સભામાં આવી પહોંચતા તરત જ મંગલાચરણ
અને ગુરુદેવની સ્તુતિ થઈ; ત્યારબાદ શેઠ પ્રેમચંદભાઈ
તથા શેઠ ખીમચંદભાઈએ સંક્ષિપ ભાષણો કર્યો. પછી
વિદ્વાન ભાઈશ્રી હિંમતલાલ જે. શાહે વિદ્વત્તાભર્યું
પ્રસંગોચિત ભાષણ કરીને બંને ડો. સાહેબોનો પરિચય
આપ્યો અને તેમણે કરેલી સેવા બદલ આભાર માન્યો;
પછી બંને ડોકટરોના માનપત્રો વાંચ્યા અને
રજતની ફ્રેઈમવાળા તે માનપત્રો (ટી–સેટ સહિત)
પ્રમુખ શ્રી રામજીભાઈના હસ્તે બંને ડોકટર સાહેબોને
ભેટ આપવામાં આવ્યા. ડો. ચીટનીસ સાહેબે
માનપત્રના જવાબરૂપે સુંદર ભાષણ (ઈંગલીશમાં) કર્યું
ને તેનો સાર ભાઈશ્રી હિંમતલાલભાઈએ ગુજરાતીમાં
કહ્યો. ડો. ચીટનીસે, ડો. મનસુખલાલભાઈ દ્વારા પોતાને
આવા મહાપુરુષની સેવાનો લાભ મળ્યો....એમ કહીને
ગુરુદેવ પ્રત્યે પ્રમોદ વ્યક્ત કર્યો અને કહ્યું કે ગુરુજીને
માટે ઓપરેશન ઉપરાંત બીજી કોઈ સેવા આપ મને
બતાવશો તો હું ખુશી થઈશ. માનપાત્ર બાદ ડો.
સાહેબોએ ગુરુદેવની આંખ તપાસીને બરાબર સંતોષ
વ્યક્ત કર્યો. આ માનપત્ર પ્રસંગ બહુ આનંદથી થયો
હતો. ગુરુદેવની આંખે બરાબર સારું થઈ જવાથી
ભક્તોને પ્રસન્નતા હતી; એની ખુશાલીરૂપે તે દિવસે
આખા સંઘનું જમણ રાખવામાં આવ્યું હતું. આ પ્રસંગે
બહારગામથી પણ અનેક મહેમાનો આવ્યા હતા ને
ગામના પણ પ્રતિષ્ઠિત માણસોને આમંત્રણ આપવામાં
આવ્યું હતું.–જાણે કે ઉત્સવ હોય એવું આજના દિવસનું
વાતાવરણ હતું. વિશેષ હર્ષની વાત એ છે કે ગુરુદેવ હવે
વાંચન શરૂ કરી શકશે, ને લગભગ શ્રાવણ સુદ પુનમે
ગુરુદેવના પ્રવચનો શરૂ થશે. આ રીતે, ગુરુદેવની આંખે
જલદી સારું થઈ જવાની ભક્તોની હાર્દિક ભાવના
સફળ થઈ છે.....ને હવે ગુરુદેવની મંગળ વાણી દ્વારા
આત્મબોધ પામવાની આપણી ભાવના પણ શીઘ્ર–
તિશીઘ્ર પૂરી થાઓ –એ જ ભાવના.
દસલક્ષણી પર્યુષણ પર્વ– ભાદરવા સુદ ૪ ને
શુક્રવાર તા. ૨૬–૮–૬૦ થી શરૂ કરીને ભાદરવા સુદ ૧૪
ને રવિવાર તા. ૪–૯–૬૦ સુધીના દસદિવસો દસલક્ષણી
પર્યુષણપર્વ તરીકે ઊજવાશે. આ દિવસો દરમિયાન દસ–
લક્ષણ મંડલનું પૂજન, તેમજ દસલક્ષણધર્મો ઉપર પૂ.
ગુરુદેવના ખાસ પ્રવચનો થશે. (વચ્ચે સુદ ૯ ઘટતી
હોવાથી દસલક્ષણપર્વ એક દિવસ વહેલા શરૂ થાય છે.)
ધાર્મિક પ્રવચનના ખાસ દિવસો
શ્રાવણ વદ ૧૨ ને શુક્રવાર તા. ૧૯–૮–૬૦ થી શરૂ
કરીને ભાદરવા સુદ ૪ ને શુક્રવાર તા. ૨૬ સુધીના આઠ
દિવસો દરમિયાન પૂ. ગુરુદેવના ખાસ પ્રવચનો થશે.
જૈન અતિથિ સેવા સમિતિની વાર્ષિક બેઠક
ભાદરવા સુદ બીજને બુધવાર તા. ૨૪–૮–૬૦ ના રોજ
શ્રી જૈન અતિથિ સેવા સમિતિની વાર્ષિક બેઠક મળશે;
સૌ સભ્યોને હાજર રહેવા વિનંતિ છે.