વાંકિયા ઉપર કાંગરાની કોતરણી, તેના નીચે સીધો દેખાવ, તેના
નીચે રત્નની સળીના થપ્પાના વાંકિયાનો મોટો મોટો આકાર કેમ
હોય-તેમ જણાતું હતું, નીચે પીળા રંગનો સીધો દેખાવ હતો,
દરવાજાની કમાનમાં રાતી રાતી લીટીઓ હતી, જુદી જાતના
આકારવાળું કાંઈક હતું. એક ઠેકાણે દરવાજો જોવામાં આવ્યો હતો;
ત્યાં અડખેપડખે ને ઉપર અડી અડીને ઉપરાઉપરી કમાન
વાળેલો, કમાન ઉપર બીજો નવીન જાતનો દેખાવ હતો. ત્યાંથી
પગથિયાં નીકળતાં હતાં. પગથિયાંનું સ્વરૂપ યાદ નથી. વાંકિયા
આદિ તેને માટે ભાષા લખાય, બાકી તો કાંઈક જુદી જ જાતનો
દેખાવ હતો. કોઈ દિવસ અહીંયાં દ્રષ્ટિએ જોયો ન હોય એવી
જાતનો આશ્ચર્યકારી દેખાવ લાગે છે. અંદર બહુ મહિમા આવ્યા
કરે છે પણ ભાષામાં કહેવું કે લખવું, તેનું વર્ણન કરતાં- થોડું
થોડું સ્મરણ આવ્યું છે તેથી-આવડતું નથી. ત્યાં અધ્ધર શ્રી
સીમંધર પ્રભુ બિરાજી રહ્યા હતા, પદ્માસન હતું, તેમનું શરીર
બહુ જ મોટું હતું, તેમના શરીરમાં પ્રકાશની ચમત્કૃતિ થઈ રહી
હતી, પ્રભુથી નીચે દેવો નાચ કરી રહ્યા હતા, શું નાચ કરી રહ્યા
હતા તે યાદ આવતું નથી. શ્રી સીમંધર પ્રભુનું સ્મરણ આવતાં
અત્યારે સાક્ષાત્ દર્શન પ્રભુનાં કેમ થતાં હોય-તેમ લાગી જાય
છે, ને તેમને બહુમાનથી હૃદય નમી પડે છે. ત્યાં શ્રી શ્રુતકેવળી
(ગણધર દેવનું નામ) શંભુ... હતું. (લાંબુ નામ પાછળ છે પણ
સ્પષ્ટ બરાબર યાદ આવતું નથી.) શંભુ બરાબર યાદ આવે છે.