-
pān̐cavān̐ adhikār ][ 99
ghaṭapaṭādikako aur ākāśako ek hī kaheṁ to kaise banegā? usī prakār lokako aur brahmako
ek mānanā kaise sambhav hai. tathā ākāśakā lakṣaṇ to sarvatra bhāsit hai, isaliye usakā
to sarvatra sadbhāv mānate haiṁ; brahmakā lakṣaṇ to sarvatra bhāsit nahīṁ hotā, isaliye usakā
sarvatra sadbhāv kaise māneṁ. is prakārase bhī sarvarūp brahma nahīṁ hai.
aisā vicār karane par kisī bhī prakārase ek brahma sambhavit nahīṁ hai. sarva padārtha
bhinna - bhinna hī bhāsit hote haiṁ.
yahān̐ prativādī kahatā hai ki — sarva ek hī hai, parantu tumheṁ bhram hai, isaliye tumheṁ ek
bhāsit nahīṁ hotā. tathā tumane yukti kahī so brahmakā svarūp yuktigamya nahīṁ hai, vacan-agocar
hai. ek bhī hai; anek bhī hai; bhinna bhī hai, milā bhī hai. usakī mahimā aisī hī hai.
usase kahate haiṁ ki — pratyakṣa tujhako va hamako va sabako bhāsit hotā hai use to
tū bhram kahatā hai. aur yuktise anumān kareṁ so tū kahatā hai ki saccā svarūp yuktigamya
hai hī nahīṁ. tathā vah kahatā hai — saccā svarūp vacan-agocar hai to vacan binā kaise nirṇay
kareṁ? tathā kahatā hai — ek bhī hai, anek bhī hai; bhinna bhī hai, milā bhī hai; parantu unakī
apekṣā nahīṁ batalātā; bāvalekī bhān̐ti aise bhī hai, aise bhī hai — aisā kahakar isakī mahimā
batalātā hai. parantu jahān̐ nyāy nahīṁ hotā vahān̐ jhūṭhe aisā hī vācālapanā karate haiṁ so karo,
nyāy to jis prakār satya hai usī prakār hogā.
sr̥ṣṭikarttāvādakā nirākaraṇ
tathā ab, brahmako lokakā karttā mānatā hai use mithyā dikhalāte haiṁ.
pratham to aisā mānatā hai ki brahmako aisī icchā huī ki — ‘eko‘haṁ bahusyāṁ’ arthāt
maiṁ ek hūn̐ so bahut hoūn̐gā.
vahān̐ pūchate haiṁ — pūrva avasthāmeṁ duḥkhī ho tab anya avasthāko cāhe. so brahmane ek
avasthāse bahutarūp honekī icchā kī to us ekarūp avasthāmeṁ kyā duḥkh thā? tab vah
kahatā hai ki duḥkh to nahīṁ thā, aisā hī kautūhal utpanna huā. use kahate haiṁ — yadi pahale
thoṛā sukhī ho aur kautūhal karanese bahut sukhī ho to kautūhal karanekā vicār kare.
so brahmako ek avasthāse bahut avasthārūp hone par bahut sukh honā kaise sambhav hai? aur
yadi pūrva sampūrṇa sukhī ho to avasthā kisaliye palaṭe? prayojan binā to koī kuch karttavya
karatā nahīṁ hai.