-
tīsarā adhikār ][ 75
tathā nāmakarmase aśubh gati, jāti hone par duḥkh mānatā thā, parantu ab un sabakā
abhāv huā; duḥkh kahān̐se ho? tathā śubhagati, jāti ādi hone par kiṁcit duḥkh dūr honese
sukh mānatā thā; parantu ab unake binā hī sarva duḥkhakā nāś aur sarva sukhakā prakāś
pāyā jātā hai. isaliye unakā bhī kuch prayojan nahīṁ rahā.
tathā gotrake nimittase nīc kul prāpta hone par duḥkh mānatā thā, ab usakā abhāv
honese duḥkhakā kāraṇ nahīṁ rahā; tathā ucca kul prāpta hone par sukh mānatā thā, parantu ab
ucca kulake binā hī trailokya pūjya ucca padako prāpta hai.
is prakār siddhoṁke sarva karmoṁkā nāś honese sarva duḥkhakā nāś ho gayā hai.
duḥkhakā lakṣaṇ to ākulatā hai aur ākulatā tabhī hotī hai jab icchā ho; parantu
icchākā tathā icchāke kāraṇoṁkā sarvathā abhāv huā, isaliye nirākul hokar sarva duḥkharahit
ananta sukhakā anubhav karatā hai; kyoṁki nirākulatā hī sukhakā lakṣaṇ hai. saṁsārameṁ bhī
kisī prakār nirākul hokar sab hī sukh mānate haiṁ; jahān̐ sarvathā nirākul huā vahān̐ sukh
sampūrṇa kaise nahīṁ mānā jāye?
is prakār samyagdarśanādi sādhanase siddhapad prāpta karane par sarva duḥkhakā abhāv hotā
hai, sarva sukh pragaṭ hotā hai.
ab yahān̐ upadeś dete haiṁ ki — he bhavya! he bhāī!! tujhe jo saṁsārake duḥkh batalāe
so ve tujhapar bītate haiṁ yā nahīṁ, vah vicār aur tū jo upāy karatā hai inheṁ jhūṭhā batalāyā
so aise hī haiṁ yā nahīṁ, vah vicāra. tathā siddhapad prāpta hone par sukh hotā hai yā nahīṁ,
usakā bhī vicār kara. jaisā kahā hai vaisī hī pratīti tujhe ātī ho to tū saṁsārase chūṭakar
siddhapad prāpta karanekā ham jo upāy kahate haiṁ vah kar, vilamba mat kara. yah upāy karanese
terā kalyāṇ hogā.
— iti śrī mokṣamārgaprakāśak śāstrameṁ saṁsāraduḥkh tathā mokṣasukhakā nirūpak
tr̥tīy adhikār pūrṇa huā ..3..
✾