देवदर्शन
दर्शनं देव देवस्य दर्शनं पापनाशनं ।
दर्शनं स्वर्गसोपानं दर्शनं मोक्षसाधनम् ।।
दर्शनेन जिनेंद्राणां साधूनां वंदनने च ।
न चिरं तिष्ठते पापं छिद्रहस्ते यथोदकम् ।।
वीतरागमुखं दृष्ट्वा पद्मरागसमप्रभम् ।
अनेकजन्मकृतं पापं दर्शनेन विनश्यति ।।
दर्शनं जिनसूर्यस्य संसारध्वान्तनाशनम् ।
बोधनं चित्तपद्मस्य समस्तार्थप्रकाशनम् ।।
दर्शनं जिनचन्द्रस्य सद्धर्मामृतवर्षणम् ।
जन्मदाहविनाशाय वर्धनं सुखवारिधेः ।।
जीवादितत्त्वं प्रतिपादकाय, सम्यक्त्वमुख्याष्टगुणाश्रयाय ।
प्रशांतरूपाय दिगम्बराय, देवाधिदेवाय नमो जिनाय ।।
चिदानन्दैकरूपाय जिनाय परमात्मने ।
परमात्मप्रकाशाय नित्यं सिद्धात्मने नमः ।।
अन्यथा शरणं नास्ति त्वमेव शरणं मम ।
तस्मात्कारुण्यभावेन रक्ष रक्ष जिनेश्वर ।।
न हि त्राता न हि त्राता न हि त्राता जगत्त्रये ।
वीतरागात्परो देवो न भूतो न भविष्यति ।।
[ ૬ ]