Atmadharma magazine - Ank 353 (Original language). Page: 3.

PDF/HTML Page 41 of 49
single page version

: ૩૮ : આત્મધર્મ : ફાગણ : ર૪૯૯

સમ્યક્ત્વની વિધિ

પ્રશ્ન :– હે ગુરુદેવ! સમ્યગ્દર્શનની વિધિ તો આપે સમજાવી, પણ તે સમજ્યા પછી

પરિણતિની ગુલાંટ કેમ મારવી?

ઉત્તર :– વિધિ યથાર્થ સમજાય ત્યાં પરિણતિ ગુલાંટ માર્યા વગર રહે નહિ. વિકલ્પજાત

અને સ્વભાવજાત એ બંનેને ભિન્ન જાણતાંવેત જ પરિણતિ વિકલ્પમાંથી છૂટી

પડીને સ્વભાવમાં તન્મય થાય છે. વિધિને સમ્યક્પણે જાણવાનો કાળ અને

પરિણતિને ગુલાંટ મારવાનો કાળ–બંને એક જ છે. વિધિ જાણે પછી તેને

શીખવવું ન પડે કે તું આમ કર. જે વિધિ જાણી તે વિધિથી જ્ઞાન અંતરમાં ઢળે

છે. સમ્યક્ત્વની વિધિને જાણનારું જ્ઞાન પોતે કાંઈ રાગમાં તન્મય નથી,

સ્વભાવમાં તન્મય છે. અને એવું જ જ્ઞાન સાચી વિધિને જાણે છે. રાગમાં

તન્મય વર્તતું જ્ઞાન સમ્યક્ત્વની સાચી વિધિને જાણતું નથી.

ચૈતન્યની સ્ફુરણા થતાં જ બધા પરભાવો છૂટી જાય છે

પ્રશ્ન :– અસંખ્યપ્રકારના પરભાવો, –તે બધાયથી છૂટવા શું કરવું? એક પરભાવથી

બચીએ ત્યાં બીજો પરભાવ ઘૂસી જાય છે, તો શું કરવું?

ઉત્તર :– સ્વભાવમાં પ્રવેશ કરતાં બધાય પરભાવો એક સાથે છૂટી જાય છે. સ્વભાવના

દરબારમાં પરભાવનો પ્રવેશ નથી. સ્વભાવમાં આવ્યા વિના, પરભાવના લક્ષે

પરભાવોથી બચી શકાય નહીં. એટલે એકસાથે સમસ્ત પરભાવોથી બચવાનો

ઉપાય એ છે કે ત્યાંથી ઉપયોગને પાછો વાળીને સ્વભાવમાં ઉપયોગ મુકવો.

આ આત્મા એવો આનંદમય ચૈતન્યપ્રકાશનો પુંજ છે કે એનું સ્ફૂરણ

થતાં જ (અર્થાત્ ઉપયોગ તેમાં ઝુકતાં વેંત જ) સમસ્ત પરભાવોની ઈન્દ્રજાળ

(વિકલ્પ તરંગો) તત્ક્ષણ ભાગી જાય છે.

પ્રશ્ન :– સમ્યગ્દર્શન પામ્યો ત્યારે જે આનંદ અનુભવાયો તેનું ભાષામાં વર્ણન આવી

શકે કે કેમ?

ઉત્તર :– એ વેદનનું વાણીમાં પૂરું વર્ણન ન આવે; અમુક વર્ણન આવે, તે ઉપરથી સામો

જીવ ‘જો તેવા લક્ષવાળો હોય તો’ સાચી સ્થિતિ સમજી જાય.

PDF/HTML Page 42 of 49
single page version

: ફાગણ : ર૪૯૯ આત્મધર્મ : ૩૯ :

અદ્ભુત! સુંદર! ગંભીર! મહાન!

ચૈતન્યતત્ત્વનો અદ્ભુત મહિમા બતાવતાં હમણાં ગુરુદેવ ઊંડાણથી વારંવાર કહે

છે કે–

અહો! શાંત... પ્રશાંત ચૈતન્યતત્ત્વ!
કેટલું સુંદર! કેટલું ગંભીર! કેટલું મહાન!
જેની નીકટતામાં પણ શાંતિના ફૂવારા છે–તેની અંદરની શાંતિની તો શી વાત!

એ શાંતિની પરમ શીતળતામાં સંસારનો કોઈ આતાપ આવી શકતો નથી... ને

સંસારના આતાપમાં મશગુલ જીવો એ શાંતિના સ્વાદને માણી શકતા નથી.

અહા! એકવાર અંદર જો તો ખરો કે–શાંતિનો સ્વાદ કેટલો સુંદર છે!
એ આત્મસ્વાદ ચાખતાં તું તૃપ્ત–તૃપ્ત થઈ જઈશ.

ઝરીયાથી શ્રી કાંતિભાઈ કોઠારી પ્રમોદથી લખે છે કે–

“આમ તો હું ગમે ત્યાંથી મેળવીને આત્મધર્મ વાંચી લઉં છું. તેમાં તમારો અંક

નં. ૩૪૦ મને બહુ જ ગમી ગયો. ભગવતી–આરાધનાના કવચઅધિકારનું વર્ણન, તથા

ભાવઅનુગમ (ષટ્ખંડાગમ) માંથી કષાય અને જ્ઞાનની ભિન્નતાનું વર્ણન વાંચતાં

અમને ઘણું જાણવાનું મળ્‌યું. જૈનદર્શનની જે વસ્તુ અલોપ (અપ્રસિદ્ધ) હતી, અને હજી

પણ આવા આગમો ઉઘાડીને ભાગ્યે જ કોઈ વાંચે છે, ત્યારે આવા કલજુગમાં તમારા

તરફથી આત્મધર્મ–પત્રિકા દ્વારા ઊંચી–ઊંચી વાનગી પીરસાય છે તે સૌ કોઈને વાંચવાનું

મન થાય તેવી છે અને તે વાંચતાં મહિમા આવે છે કે વાહ! આપણા જૈનધર્મમાં કેવા–

કેવા મહાન આચાર્યો થઈ ગયા છે! –આમ જૈનધર્મમાં વધુ પ્રીતિ આવે છે. ખરેખર,

ષટ્ખંડાગમ જેવા મહાન જૈનગ્રંથો દુનિયાને હેરત પમાડે તેવા છે. કષાય અને જ્ઞાનની

જે ભિન્નતા સમજાવી છે તે અદ્ભુત છે.

લી. કાન્તિલાલ કોઠારી, ઝરીયા.

પ્રશ્ન :– કીડી વગેરે ત્રણઈન્દ્રિય જીવ અંધકારને જાણી શકે?
ઉત્તર :– ના; અંધકાર તે આંખનો વિષય છે; આંખવાળો જીવ જ અંધકારને જાણી શકે.
પ્રશ્ન :– આરાધના એટલે શું? તેમાં જીવે શું કરવાનું હોય છે?

PDF/HTML Page 43 of 49
single page version

: ૪૦ : આત્મધર્મ : ફાગણ : ર૪૯૯

ઉત્તર :– જેની આરાધના કરવાની છે એવા પોતાના શુદ્ધાત્માને જ આરાધ્યદેવ તરીકે

સ્થાપીને, તેની શ્રદ્ધા–જ્ઞાન–અનુભૂતિ કરવી, એનાથી વિરુદ્ધ રાગાદિ બીજા કોઈ
ભાવોને અનુભૂતિમાં પ્રવેશવા ન દેવા–એનું નામ આરાધના છે. આ
આરાધનામાં પરભાવોથી ભિન્ન પોતાના સાચા સ્વરૂપને ઓળખીને જીવે
તેનું જ સેવન કરવાનું છે. આત્માની ઓળખાણરૂપ સમ્યગ્દર્શન તે પ્રથમ
આરાધના છે.

પ્રશ્ન :– સમુદ્ઘાત વખતે કેવળીપ્રભુના આત્મપ્રદેશો આપણા આત્માને સ્પર્શી જાય છે

છતાં આપણને ખબર કેમ પડતી નથી?

ઉત્તર :– સમુદ્ઘાત વખતે કેવળી પ્રભુના આત્મપ્રદેશો આખા લોકમાં ફેલાય છે એટલે

અહીં આપણી પાસે પણ આવે છે–એ ખરૂં, પણ તે આત્મપ્રદેશો અતીન્દ્રિય છે,
ઈંદ્રિયજ્ઞાનનો તે વિષય નથી. એનું સ્વરૂપ વિચારતાં અતીન્દ્રિય આત્મા લક્ષમાં
આવી જાય છે. એકક્ષેત્રની અપેક્ષાએ ભલે સ્પર્શ કહેવાય, બાકી તો આત્મપ્રદેશો
અસ્પર્શી છે. વળી તે એકપ્રદેશીપણાનો કાળ પણ માત્ર એક–બે કે ત્રણ સમયો
જ છે, ને તેથી છદ્મસ્થજ્ઞાનનો વિષય તે થઈ શકે નહિ. અસંખ્ય સમયથી ઓછા
કાળની વસ્તુને છદ્મસ્થનો ઉપયોગ પકડી શકતો નથી.

પ્રશ્ન :– માંસાહારી જૈન હોઈ શકે?
ઉત્તર :– ના; કોઈપણ જૈન કદી માંસાહારી હોઈ શકે નહિ, માંસાહાર હોય ત્યાં જૈનપણું

હોઈ શકે નહિ. અરે, સિંહ જેવા માંસભક્ષી પ્રાણી પણ જ્યાં ધર્મ સમજે છે કે
તરત માંસાહાર છોડીને સમાધિમરણ કરે છે અથવા તો નિર્દોષ ખોરાક ખાઈને
જીવે છે. માંસાહારનું જેમાં પ્રતિપાદન હોય તે શાસ્ત્ર નથી, તે તો કુશાસ્ત્ર છે.

યાદ રહે કે ઈંડા, મધ વગેરે પણ માંસની જેમ જ સર્વથા અભક્ષ છે.

દવારૂપે પણ તેનું ભક્ષણ આર્ય માણસને હોય નહીં.

પોતાના શરીરનું માંસ કાપીને કોઈ રાજાએ દાન કર્યું–એવી કથા આવે

છે, –પણ તે યોગ્ય નથી; જ્ઞાની એવું કરે નહીં. આ સંબંધમાં શાંતિનાથ
ભગવાનના પૂર્વભવનો એક પ્રસંગ આવે છે, તે કોઈવાર કહેશું.

PDF/HTML Page 44 of 49
single page version

: ફાગણ : ર૪૯૯ આત્મધર્મ : ૪૧ :

આધુનિક આશ્ચર્ય

હજાર વર્ષથી શ્રવણબેલગોલમાં સ્થિત ભગવાન બાહુબલીની પ૭ ફૂટ ઊંચી

અદ્ભુત અજાયબ મૂર્તિ દેખીને આપણે આશ્ચર્ય પામી જઈએ છીએ. હજાર વર્ષ પહેલાંં જે

આશ્ચર્યકારી બનાવ બન્યો તેવો બનાવ આજે પણ બની રહ્યો છે–તે જાણીને

જિજ્ઞાસુઓને આશ્ચર્ય થશે.

મૈસુર રાજ્યમાં ધર્મસ્થલ નામનું એક ક્ષેત્ર ધાર્મિક સંસ્કૃતિના આદર્શ જેવું છે.

શ્રવણબેલગોલથી તે થોડા જ માઈલ દૂર છે. ત્યાંના એક ટેકરા ઉપર ભગવાન બાહુબલી

સ્વામીની પીઠિકા સહિત બાવન ફૂટ ઊંચી પ્રતિમા સ્થાપિત થવાની છે. સ્વર્ગસ્થ

રત્નવર્મ હેગ્ગડેને આ ભવ્ય પ્રતિમા નિર્માણ કરાવીને ધર્મસ્થલમાં સ્થાપવાની ભાવના

જાગેલી. પરંતુ આવી અદ્ભુત મૂર્તિ બનાવી શકે એવા શિલ્પકાર ક્યાં મળશે! એની

ચિંતામાં હતા. ભારતદેશ તો આવી શિલ્પકળા માટે જગપ્રસિદ્ધ છે... એટલે શોધખોળ

કરતાં કારકલમાં (જ્યાં બાહુબલી ભગવાનની બીજી એક ઊંચી પ્રતિમા બિરાજે છે તે

શહેરમાં) શ્રી રેંજાલ ગોપાલ શૈણે નામના એક અનુભવી શિલ્પકળામાં કુશળ કલાકાર

મળી ગયા; અને ઘણાં અલ્પકાળમાં આ મહાન કાર્ય પૂરું કરી આપવાનો તેમણે નિર્ણય

કર્યો. ઈ. સ. ૧૯૬૮ ના જુન માસમાં આ મંગળ કાર્યનો પ્રારંભ થયો. સેંકડો કારીગરો

દિનરાત કામે લાગી ગયા; કોઈ જાતના વિઘ્ન વગર તે ભવ્યમૂર્તિ તૈયાર થઈ ગઈ અને

હવે આ પ્રતિમાને કારકલથી (૪પ માઈલ) ધર્મસ્થલ પહોંચાડવા માટેની મહાન

વ્યવસ્થા ચાલી રહી છે– તે માટે વચ્ચેની સડકો મજબૂત બનાવાઈ રહી છે. મુંબઈની

એક કંપનીએ તેનો કોન્ટ્રાકટ રાખ્યો છે ને તે માટે ૮૪ પૈડાવાળી એક ખાસ ટ્રોલી તૈયાર

કરેલ છે. બાવન ફૂટ ઊંચી આ મૂર્તિનુ વજન ૧૭૦ ટન (લગભગ દશ હજાર મણ) છે.

૪પ માઈલના રસ્તામાં આ મૂર્તિ સાથે હજારો યાત્રિકભક્તો પણ ધામધૂમથી વિહાર

કરશે; સાથે પ૦ જેટલા હાથી, અનેક બેંડપાર્ટી, પત્રકારો, ટેલિવિઝન વગેરે પણ હશે.

વચ્ચે આવતા બધા જિનાલયોમાં પૂજનાદિ કરતાં–કરતાં, વચ્ચે વેણૂરસ્થિત બાહુબલી

ભગવાનનો મસ્તકાભિષેક પણ કરીને, હજારો યાત્રિક સહિત ધામધૂમથી પ્રતિમા

‘ધર્મસ્થલ’ પહોંચશે. ધર્મસ્થલમાં દર વર્ષે આવનારા લાખો યાત્રિકો આ અદ્ભુત

મૂર્તિના દર્શનથી પ્રભાવિત થશે.

આ મૂર્તિ લગભગ રપ ફેબ્રુઆરીએ કારકલથી રવાના થવાની હતી, –એટલે

PDF/HTML Page 45 of 49
single page version

: ૪ર : આત્મધર્મ : ફાગણ : ર૪૯૯

અત્યારે તો ધર્મસ્થલ પહોંચી પણ ગઈ હશે.) આ ઉપરાંત રસ્તાની મજબુતીની

ચકાસણી માટે પ્રથમ એક જ પથ્થરના અખંડ માનસ્તંભ માટેનો પ૪ ફૂટ ઊંચો પથ્થર

(ત્રણ હજાર મણ વજનનો) કારકલથી ધર્મસ્થલ લઈ જવાનો હતો.

ઈ. સ. ૧૯૭૦ માં રાષ્ટ્રપતિ શ્રી વી. વી. ગીરી ધર્મસ્થલની મુલાકાતે ગયેલા

ત્યારે આ દિવ્યમૂર્તિ સ્થાપવા માટેના ‘બાહુબલી–વિહાર’ નો પાયો તેમના હસ્તે નંખાયો

હતો. હવે થોડા સમયમાં ભવ્ય પ્રતિમાજીની સ્થાપના થશે;– રાષ્ટ્રના ઈતિહાસમાં સેંકડો

વર્ષે બનનારી આ એક મહાન ઘટના હશે. જગતને વીતરાગતાનો સંદેશ આપીને

ચૈતન્યસાધનાની શૂરવીરતા જગાડનાર એ દિવ્ય મુદ્રાવંત વીર બાહુબલીનાથને આપણે

નમસ્કાર કરીએ છીએ.

દિગંબરોનો ધર્મ

દિગંબર જૈનનો પહેલો ધર્મ એ છે કે વીતરાગી અરિહંત દેવ–ગુરુને

ઓળખીને તેમના જેવા પોતાના શુદ્ધ ‘દિગંબરઆત્માને’ એટલે કે પરભાવોની

લાગણીથી રહિત એવા શુદ્ધ જ્ઞાનમય આત્માને ઓળખવો. આવા આત્માને

ઓળખતાં મિથ્યાત્વરૂપી મહાન પરિગ્રહ છૂટીને અંશે નિર્ગ્રંથપણું થાય છે, અને

સમ્યક્ત્વભાવરૂપ દિગંબરધર્મની શરૂઆત થાય છે; ત્યારે જ સંપૂર્ણ નિર્ગ્રંથ

એવા વીતરાગી દેવ–ગુરુની ઓળખાણ થાય છે. આવો સમ્યક્ત્વભાવ પ્રગટ

કરીને મિથ્યાત્વ–ગ્રંથિને છોડવી તે દિગંબરોનો પહેલો ધર્મ છે.

જ્યાં મિથ્યાત્વગ્રંથી છૂટીને સમ્યક્ત્વધર્મ થયો ત્યાં સર્વથા નિષ્પરિગ્રહી,

ચિદાનંદતત્ત્વની અનુભૂતિ થઈ–શ્રદ્ધા થઈ–જ્ઞાન થયું; તે જ તત્ત્વમાં એકાગ્ર

થઈને શુદ્ધોપયોગી ચારિત્રના બળે વસ્ત્રાદિ સમસ્ત પરિગ્રહોનું મમત્વ છૂટી

જાય ને દિગંબર દશા ધારણ કરીને મુનિદશા પ્રગટે તે સાક્ષાત્ દિગંબર ધર્મ છે.

પહેલાંં સમ્યગ્દર્શન પછી દિગંબર જૈનોનું આ બીજું કર્તવ્ય છે.

આ રીતે આત્મભાન કરીને સમ્યક્શ્રદ્ધા–જ્ઞાનપૂર્વક વીતરાગી

ચારિત્રદશાનું આરાધન તે દરેક દિગંબર જૈનનો ધર્મ છે, તે મોક્ષનો માર્ગ છે.

જે આવું આરાધન કરે તે જ સાચો દિગંબર જૈન છે.

PDF/HTML Page 46 of 49
single page version

: ફાગણ : ર૪૯૯ આત્મધર્મ : ૪૩ :

નિર્ગ્રંથનો પંથ... ભવઅંતનો ઉપાય છે

સાચું નગ્નપણું ક્યારે થાય?
શરીર અને ઈંદ્રિયોથી આત્માનું જુદાપણું જેના

અનુભવમાં આવ્યું છે, એટલે શ્રદ્ધા–જ્ઞાનમાં તો

અતીન્દ્રિભાવ જેને થઈ ગયો છે, અને તે ઉપરાંત

અતીન્દ્રિય ચૈતન્યમાં લીનતા વડે સ્પર્શાદિ

ઈંદ્રયવિષયોમાંથી જેની પરિણતિ હટી ગઈ છે એટલે

અંતરમાં અસ્પર્શીપણું થયું છે ત્યાં બહારમાં શરીરનું

નગ્નપણું સહેજે હોય છે. આવી દશા તે વીતરાગમાર્ગમાં જૈનમુનિઓની દશા છે... તેઓ

મોક્ષને સાધે છે કુંદકુંદસ્વામી સમયસારની ૩૧મી ગાથામાં કહે છે કે અતીન્દ્રિય

જ્ઞાનસ્વભાવી આત્માનો જ્યારે અનુભવ થયો ત્યારે ઈંદ્રિયોથી જુદાપણારૂપ ભેદજ્ઞાન

થયું, તે જિતેન્દ્રિય થયો, તે જિનનો ભક્ત થયો, તે સમ્યગ્દ્રષ્ટિ–મોક્ષમાર્ગી થયો.

આવા અતીન્દ્રિયઆત્માને અનુભવીને તેમાં જેઓ ઠર્યા–એવા મુનિઓને શરીર

પણ આવરણ વગરનું ખૂલ્લું થઈ જાય છે; તેમને શરીરનો કોઈ ભાગ ઢાંકવાની વૃત્તિ

હોતી નથી, કેમકે દેહાતીત ચૈતન્યભાવ પ્રગટી ગયો છે, દેહને ઢાંકવાની વૃત્તિ રહે ને મોક્ષ

પણ સધાય–એમ બની શકતું નથી. વીતરાગનો માર્ગ તો નિર્ગ્રંથમાર્ગ છે, આત્મામાં

મોહની ગાંઠ નહિ, દેહમાં વસ્ત્રના પરિગ્રહરૂપ ગાંઠ નહીં, એવો નિર્ગ્રંથ મોક્ષમાર્ગ છે.

અહો, આવા નિર્ગ્રંથ મોક્ષમાર્ગને ઓળખીને આરાધતાં ભવના અંત આવે છે.

‘નિર્ગ્રંથનો પંથ ભવઅંતનો ઉપાય છે.’

ગુરુદેવે અધ્યાત્મમાર્ગ ખુલ્લો કરીને જૈનજગતનું હિત કર્યું છે–

“હું ૪પ વર્ષથી પૂ. ગુરુદેવશ્રીના પરિચયમાં છું. તેમની ઘણી જ કૃપા છે. પૂ.

ગુરુદેવે આગમશાસ્ત્રોના અભ્યાસ અને મંથન પછી જૈનદર્શનને નવો વળાંક આપ્યો છે;

અને સારા દેશના જૈન તથા જૈનેતર તત્ત્વચિંતકોની આંખોને નવી દ્રષ્ટિ આપી

અધ્યાત્મમાર્ગ ખુલ્લો કરી જગત ઉપર મહાન ઉપકાર કર્યો છે. આત્મધર્મ માસિકમાં

ઘણી રસપ્રદ બાબતો આવે છે, વાંચતાં પ્રમોદ આવે છે. ‘આત્મધર્મ’ માસિકે

અધ્યાત્મરસપૂર્ણ વાનગીઓ પીરસી સમાજનું અને જૈનજગતનું ઘણું હિત કર્યું છે. (લી:

આર. પી. કોઠારી; જામનગર મ્યુની. ના રીટાયર્ડ ચીફ ઓફિસર.)

PDF/HTML Page 47 of 49
single page version

: ૪૪ : આત્મધર્મ : ફાગણ : ર૪૯૯

કાશીના પંડિતજી પૂજાના વાસણ લેવા ગયા ત્યારે–

ફત્તેપુરમાં પ્રતિષ્ઠા વખતે બનારસના પં. ફૂલચંદજીએ એક પ્રસંગ કહ્યો:– એકવાર

મુંબઈમાં તેઓ પૂજા માટેના સ્ટીલના વાસણ લેવા ગયેલા. સ્ટીલના વાસણના એક

સેટની કિંમત તે જમાનામાં સાડા અગિયાર આના થઈ. કરકસર માટે પંડિતજીએ

દુકાનદારને કહ્યું કે ભાઈ, બે પૈસા ઓછા લ્યો એટલે કે અગિયાર આના લ્યો.

દુકાનદાર કહે: અરે પંડિતજી! તમે ભગવાનની પૂજા માટે આ વાસણ લઈ જાવ

છો. એટલે ભગવાન તો તમને ઘણા પૈસા આપશે! પછી બે પૈસાનો લોભ શું કરો છો?

પંડિતજી પણ ખરા હતા... એ તો કાંઈ બોલ્યા–ચાલ્યા વગર, કે પૈસા આપ્યા

વગર, એમને એમ વાસણ થેલીમાં નાંખીને માંડ્યા હાલવા!

દુકાનદાર તો આભો થઈ ગયો... ને સાદ કર્યો કે અરે પંડિતજી! પૈસા તો

આપતા જાવ!

પંડિતજી કહે–ભાઈ, આ વાસણ તો હું ભગવાનની પૂજા કરવા લઈ જાઉં છું; તમે

જ હમણાં કહ્યું કે ભગવાન ઘણા પૈસા આપશે! તો તમારા વાસણથી હું ભગવાનની

પૂજા કરીશ તેથી તમને પણ ભગવાન ઘણા પૈસા આપશે! –પછી મારી પાસેથી

અગિયારઆના લેવાની શી જરૂર છે!

પંડિતજીએ કેવી સરસ યુક્તિથી ઈશ્વરકર્તૃત્વનું ખંડન કર્યું! વેપાર તો પંડિતજીની

યુક્તિથી અંજાઈ ગયો.

પછી તો પંડિતજીએ પૂરા પૈસા ચૂકવી દીધા, ને તેને યુક્તિથી સમજાવ્યું કે ભાઈ,

ઈશ્વર મને કે તને કાંઈ આપતા નથી. ઈશ્વર તો પૂર્ણ દશાને પામેલા પરમાત્મા છે, તેઓ

પૂજા વડે પ્રસન્ન થઈને કાંઈ આપતા નથી, તેમજ નિંદા કરનારને તેઓ કોઈ શિક્ષા કરતા

નથી. અને આપણે પણ ભગવાન પાસેથી કાંઈ લેવા માટે તેમની પૂજા નથી કરતા.

આપણે તો ભગવાનના ગુણો પ્રત્યેનું બહુમાન પૂજા દ્વારા વ્યક્ત કરીએ છીએ. તેમાં

આપણા પરિણામની જેટલી વિશુદ્ધિ થાય છે તેટલો આપણને લાભ છે.

PDF/HTML Page 48 of 49
single page version

સોનગઢ સમાચાર... (મુખપૃષ્ઠના બીજા પાનેથી ચાલુ)

• ફાગણ વદ બીજ (મંગળવાર તા. ર૦મી માર્ચ) ના રોજ પૂ. ગુરુદેવ

સોનગઢથી મુંબઈ (ઘાટકોપર–સર્વોદય ઈસ્પિતાલમાં બંધાયેલા આદિનાથપ્રભુના

જિનાલયની પ્રથમ વર્ષગાંઠ નિમિત્તે) પધારશે. ત્યાંથી બેંગ્લોરમાં જિનમંદિર તથા

સમવસરણ–મંદિરના શિલાન્યાસ નિમિત્તે (તા. ર૩–ર૪ માર્ચ) ગુરુદેવ બેંગ્લોર પધારશે.

બેંગ્લોરથી પુન: મુંબઈ પધારશે–ત્યાં રવિવાર તા. રપના રોજ બંને વખત પ્રવચનો થશે;

ને તા. ર૬ સોમવારે ગુરુદેવ ભાવનગર થઈને પુન: સોનગઢ પધારશે. મુંબઈના કાર્યક્રમ

દરમિયાન જિનમંદિરોના દર્શન ઉપરાંત ગુરુવારે બોરીવલી–સ્થિત ‘ત્રિમૂર્તિ’ ભગવંતોના

દર્શને પણ પધારશે.

• આ વખતે દેશમાં દુષ્કાળની મુશ્કેલ પરિસ્થિતિ વર્તતી હોવાથી, સોનગઢમાં

ધાર્મિકશિક્ષણ વર્ગો ચાલશે નહીં. જોકે સોનગઢમાં પાણીની મુશ્કેલી નથી, તેમજ સમિતિની

ભોજનશાળા વ્યવસ્થિત ચાલુ છે; પણ શિક્ષણવર્ગો ચલાવવા યોગ્ય પરિસ્થિતિ નથી.

સોનગઢમાં ગાયોના ઘાસચારા માટે ખાસ વ્યવસ્થા કરવામાં આવી છે, તે માટેનું એક

ખાસ જુદું ફંડ પણ ચાલે છે.

• આત્મધર્મના પ્રચારમાં જિજ્ઞાસુજીવો ખૂબ ઉત્સાહથી રસ ધરાવે છે, ને ગ્રાહક

સંખ્યા હિંદી–ગુજરાતી મળીને છ હજાર સુધી પહોંચી ગઈ છે. તેમાં ૧ર૦ જેટલા અંકો તો

પરદેશોમાં જાય છે. આપ પણ આપના સ્નેહીજનોને ભારતના ઉત્તમ અધ્યાત્મસંસ્કારનો

સ્વાદ ચખાડવા આત્મધર્મ જરૂર મોકલો. માત્ર દશ રૂા. માં આખા વર્ષ સુધી ભારતદેશના

ઊંચા અધ્યાત્મ–સંસ્કારોથી તે પરદેશમાં ભારતનું ગૌરવ વધારશે. અરે, આત્મધર્મ ઘરના

ટેબલ ઉપર અમસ્તુ પડ્યું હશે તોપણ તેને દેખી–દેખીને ભારતના ઉચ્ચસંસ્કારો તેને યાદ

આવશે. પરદેશમાં લવાજમ વાર્ષિક દશ રૂપિયા છે; ભારતમાં ચાર રૂપિયા છે.

ધ્રાંગધ્રાના સવિતાબેન (તેઓ વકીલ

કેશવલાલ ડામરભાઈ શાહના ધર્મપત્ની, ઉ વર્ષ પપ)

તા. પ–૩–૭૩ના રોજ મુંબઈ મુકામે તેમના ભત્રીજા

રજનીકાન્તને ઘેર સ્વર્ગવાસ પામ્યા છે. દેવ–ગુરુ–ધર્મના શરણે તેઓ આત્મહિત પામો.

નાઈરોબીના ભાઈશ્રી ચંદ્રકાન્તભાઈની બેબી માલાબેન, માત્ર સવાછ માસની

વયે તા. ૧૯–ર–૭૩ના રોજ સ્વર્ગવાસ પામેલ છે. પુણ્યવંત ઘરે જૈનકુળમાં આવીને પણ

આયુષ્યની આવી અલ્પતા દેખીને, જિજ્ઞાસુજીવોએ આયુષ્યનો ભરોસો છોડીને ચૈતન્યનું

કામ તત્કાળ કરવા જેવું છે.

PDF/HTML Page 49 of 49
single page version

ફોન નં. : ૩૪ “આત્મધર્મ” Rgd. No. G. 182

જેના સેવનથી ભવનો પાર પમાય ને મોક્ષસુખ મળે

એવા જૈનમાર્ગનો પરમ મહિમા

જૈન સંપ્રદાયમાં આવીને પણ જેઓ અનેકવિધ વિષયકષાયના પોષક કુમાર્ગને

સેવી રહ્યા છે એવા જીવો પ્રત્યે અત્યંત કરુણાથી, જૈનમાર્ગના પરમ મહિમાપૂર્વક

ગુરુદેવ કહે છે કે–

અરે જીવ! તું મનુષ્ય થઈને જૈનસંપ્રદાયમાં આવ્યો, પંચપરમેષ્ઠી ભગવાન તને

નિમિત્ત તરીકે મળ્‌યા, એમની રત્ન જેવી વાણી તને મળી, –અને હજી તું બીજે જ્યાં–

ત્યાં કુમાર્ગમાં ભટક! –એ તો શરમ છે... કલંક છે. ઈન્દ્રો જેને ભક્તિથી પૂજે એવા

ભગવાન તને નિમિત્તપણે મળ્‌યા અને હજી તું બીજા અજૈન રસ્તે જા–એ તે કાંઈ

શોભે છે!

બાપુ! અરિહંત અને સિદ્ધ જેવા પરમાત્મા દેવ, અને આચાર્ય–ઉપાધ્યાય–સાધુ

જેવા વીતરાગીગુરુઓ, ને તેમની અલૌકિક વાણી, –આવો મહાન યોગ મળવો બહુ

મોંઘો છે. અરે, આવી ઉત્તમ વસ્તુ તને મળી, જૈનધર્મ તને મળ્‌યો, – તેમણે મહાન

ચૈતન્યનિધાન તને તારામાં બતાવ્યા, –તો હવે બીજે ભટકવાનું છોડ....ને અંદર તારા

ચૈતન્યનિધાનને દેખ. અરે, પંચપરમેષ્ઠી ભગવંતોનો કેટલો મહિમા છે! એને તો

ઓળખ... તોય તને કુમાર્ગમાંથી પ્રેમ છૂટી જશે. આ જગતમાં જૈનમાર્ગ સિવાય

સજ્જનોને બીજું કોઈ શરણ નથી.

અરે જીવ! જૈનમાર્ગ પામીને તને એમ મહિમા આવવો જોઈએ કે અહા!

આવો સુંદર જૈનમાર્ગ, ગુરુપ્રતાપે આ કળિકાળમાં મહાભાગ્યે મને મળ્‌યો–કે જેના

સેવનથી મારા ભવદુઃખનો અંત આવે ને મને મોક્ષનું મહાન સુખ મળે. તો હવે જગત

આખાને એકકોર મુકીને, આવો પરમહિતકર જૈનમાર્ગ, અને વીતરાગી પંચપરમેષ્ઠી

ભગવંતોને બરાબર ઓળખીને, તેનો અત્યંત મહિમા લાવીને, તેમણે બતાવેલા મારા

આત્મસ્વરૂપને ઓળખીને, આ અવસરમાં આત્મહિતને સાધી જ લઉં.

અહો ધન્ય છે આ જગતમાં પંચપરમેષ્ઠી ભગવંતો, અને તેમણે
બતાવેલો જૈનધર્મ,... કે જેના પ્રતાપે આ જીવ અપૂર્વ હિત પામ્યો.

< Previous Page